Sun | Aug 25, 2019

Carolyn Cooper | Hotel guard fi stop harass wi pon di beach!

Published:Sunday | July 21, 2019 | 12:22 AM

CHAKA-CHAKA SPELLING

Sunday gone, mi go a MoBay fi gi speech fi di PNP woman conference. Same day Peter Bunting im a launch fi im campaign fi turn PNP president. Wa mek im go clash wid di woman dem conference? It look like seh Bunting no want none a dem deh woman vote fi im. An yu shuda hear how di woman dem gwaan wen Peter Phillips im come eena di auditorium. One piece a excitement! Yu wuda tink seh all a dem win super lotto!

Eena di morning, mi go a beach. Mi did a stay at Spanish Court Hotel, side a Doctor’s Cave Beach. Di hotel full a vibes. Nuff art all bout: Michael ‘Freestylee’ Thompson reggae poster dem; an Derval Johnson fantastic carving dem; an one big, beautiful mask weh Nakazzi Hutchinson mek. An as fi Marina Bernei photograph dem! Shi ketch di face a Jamaica.

So mi lef di hotel an go tek a lickle walk pon di beach. Wen mi reach Decameron Hotel, one security guard im come up an tell mi seh mi wristband a no fi di hotel. As if mi no know. Im never get no chance fi seh nutten more. Mi tell im seh mi deh pon di public beach. Mi no deh pon Decameron property. Im seh suppen like seh a ongle warn im a warn mi so mi no come pon di property.

Mi tell im seh if mi no deh pon Decameron property, im nah no right fi seh nutten to mi. A harass im a harass mi. An mi aks im fi call di hotel manager or one supervisor. Im seh im kyaahn dweet. So mi seh, alright, mi a go a di lobby. Im seh if mi come pon di property, im a go ‘restrain’ mi. Im seh mi fi put on mi clothes, go out a road an go eena di hotel lobby from out deh so.

WAT A POPPYSHOW!

Mi never plan fi waste out mi lickle beach time a quarrel. So eena di evenin wen mi come back from conference, mi go a di front a Decameron Hotel an aks di guard fi mek mi go talk to one a di hotel manager dem. Mi tell her di whole story bout me an di guard from eena di morning. Shi tell mi seh a ongle guest shi can let een. Shi mek mi talk to one supervisor from di security company. Same story. Mi can’t go een sake a ‘protocol.’ Wat a poppyshow!

Wen mi come back a town, mi call Decameron. An mi tell one a di top manager dem wa happen. Im seh im sorry an im a go talk to di security company. Lickle after dat, one a di security company owner im call an im seh im sorry an im a go ‘discipline’ di guard. Mi seh no! A no di guard fi discipline. A oonoo. Di guard must a do wa oonoo tell im fi do.

An a no deh so di discipline a fi start. Govament a fi discipline di hotel owner dem, mek dem know seh dem no own di beach! An dem fi stop set security guard pon wi like bad dog. An a wi a fi discipline Govament. Di whole a wi, weh a fi a fight up fi go a good beach. Wi a fi mek di politician dem know seh dem better stop sell wi out. Backra day done!

PRAPA-PRAPA SPELIN

Sonde gaan, mi go a MoBay fi gi spiich fi di PNP uman kanfrans. Siem die Peter Bunting im a laanch fi im kyampien fi ton PNP prezident. Wa mek im go klash wid di uman dem kanfrans? It luk laik se Bunting no waahn non a dem de uman vuot fi im. An yu shuda ier ou di uman dem gwaan wen Peter Phillips im kom iina di aadituoriyom! Wan piis a eksaitment! Yu wuda tingk se aal a dem win suupa lato!

Iina di maanin, mi go a biich. Mi did a stie at Spanish Court Hotel, said a Doctor’s Cave Beach. Di otel ful a vaibz. Nof aat aal bout: Michael ‘Freestylee’ Thompson rege puosta dem; an Derval Johnson fantastik kaavin dem; an wan big, byuutifiul maask we Nakazzi Hutchinson mek. An az fi Marina Bernei fuotograaf dem! Shi kech di fies a Jamieka.

So mi lef di otel an go tek a likl waak pan di biich. Wen mi riich Decameron Hotel, wan sikyuorti gyaad im kom op an tel mi se mi risban a no fi di otel. Az if mi no nuo! Im neva get no chaans fi se notn muor. Mi tel im se mi de pan di poblik biich. Mi no de pan Decameron prapati. Im se sopn laik se a ongl waan im a waan mi so mi no kom pan di prapati.

Mi tel im se if mi no de pan Decameron prapati, im naa no rait fi se notn tu mi. A haras im a haras mi. An mi aks im fi kaal di otel manija ar wan suupavaiza. Im se im kyaahn dwiit. So mi se, aarait, mi a go a di labi. Im se if mi kom pan di prapati, im a go ‘restrain’ mi. Im se mi fi put aan mi kluoz, go out a ruod an go iina di otel labi fram out de so.

WAT A PAPISHUO!

Mi neva plan fi wies out mi likl biich taim a kwaril. So iina di iivnin wen mi kom bak fram kanfrans, mi go a di front a Decameron Hotel an aks di gyaad fi mek mi go taak tu wan a di otel manija dem. Mi tel ar di uol stuori bout mii an di gyaad fram iina di maanin. Shi tel mi se a ongl ges shi kyan let iin. Shi mek mi taak tu wan suupavaiza fram di sikyuoriti kompini. Siem stuori. Mi kyaahn go iin, siek a ‘protocol.’ Wat a papishuo!

Wen mi kom bak a toun, mi kaal Decameron. An mi tel wan a di tap manija dem wa apn. Im se im sari an im a go taak tu di sikyuoriti kompini. Likl aafta dat, wan a di sikyuoriti kompini uona im kaal an im se im sari an im a go ‘disiplin’ di gyaad. Mi se nuo! A no di gyaad fi disiplin. A unu! Di gyaad mos a du wa unu tel im fi du.

An a no de so di disiplin a fi staat. Govament a fi disiplin di otel uona dem, mek dem nuo se dem no uon di biich! An dem fi stap set sikyuoriti gyaad pan wi laik bad daag. An a wi a fi disiplin Govament. Di uol a wi, we a fi a fait op fi go a gud biich! Wi a fi mek di palitishan dem nuo se dem beta stap sel wi out. Bakra die don!

- Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.